Það má með sanni segja að Sinfóníuhljómsveit Norðurlands hafi klárað 20. starfsár sitt með pompi og prakt með barokktónleikunum Leikið á litróf tilfinninganna. Flutt var verkið Missa dei patris eftir Zelenka í samvinnu við Kór Akureyrarkirkju og barokksmiðju Hólastiftis. Ríflega 100 manns stigu á stokk og þótti flutningurinn einkennast af krafti og gleði undir stjórn Eyþórs Inga Jónssonar sem jafnframt er  organisti og kórstjóri Akureyrarkirkju. Einsöngvararnir Hulda Björk Garðarsdóttir, Alina Dubik, Gunnar Guðbjörnsson og Ágúst Ólafsson þóttu öll glæsileg og áheyrendur voru sammála um að þarna væri einvalalið einsöngvara á ferð. Tónleikarnir voru mjög vel sóttir þrátt fyrir vonskuveður og lauk með standandi lófaklappi. Einn áheyrandanna komst svo að orði:

Ég fer héðan út sáttur og upprifinn, krafturinn á tónleikunum er mín sumarkoma

Sinfóníuhljómsveit Norðurlands þakkar öllum fyrir komuna og samfylgdina á tónleikaárinu 2012-2013

Það er vissulega ekki orðum aukið að mikið verði um dýrðir þann 28. apríl í Hofi. Þá gengur Sinfóníuhljómsveit Norðurlands til liðs við Kór Akureyrarkirkju, stærsta kirkjukór landsins, Barokksmiðju Hólastiftis og hluta af landsliði íslenskra einsöngvara, þeim Huldu Björk Garðarsdóttur sópran, Alinu Dubik mezzósópran, Snorra Wium tenór og Ágústi Ólafssyni bassa. Þessi öflugi hópur sem telur ríflega hundrað manns flytur verkið Missa Dei Patris eftir tékkneska tónskáldið Jan Dismas Zelenka (1679-1745) undir stjórn Eyþórs Inga Jónssonar sem jafnframt er organisti og kórstjóri Akureyrarkirkju. Verkið er krefjandi og undirbúningur mikill og er með stærri verkum sem Kór Akureyrarkirkju hefur tekið þátt í. 

Mikil ánægja ríkir með samstarfið enda opnast við það mörg tækifæri. Með samvinnu mismunandi  aðila sem  koma að menningarstarfi er hægt að setja upp stærri og meira krefjandi verk en ella og er það von allra að þetta verkefni sé bara byrjunin.

Eyþór Ingi segir samstarfshópinn fullan tilhlökkunar. „Þetta verða glæsilegir tónleikar. Að leiða saman Sinfóníuhljómsveit Norðurlands, frábæra einsöngvara og þennan sterka og magnaða kór sem Kór Akureyrarkirkju er, býður upp á einstaka upplifun sem enginn tónlistarunnandi ætti að láta fram hjá sér fara. Hópurinn er samheldinn og það er mjög gefandi fyrir alla þessa aðila að fá tækifæri til að vinna saman og skapa tónlistaratburð af þessu tagi“

Missa Dei Patris er á margan hátt óvenjulegt, sérstaklega ef það er borið saman við verk samtímamanna Zelenka, J.S. Bach, G.F. Händel o.fl. Í verkinu eru hressileg tékknesk þjóðlagaáhrif, ítölsk gamansemi og hraði ásamt áhrifum frá þýska barokkskólanum. Verkið er fjörugt og krefjandi fyrir kór og hljómsveit vegna mikils hraða sem er aðaleinkenni þess. Verkið er engu að síður afar aðgengilegt á að heyra. 

Það má með sanni segja að Sinfóníuhljómsveit Norðurlands ásamt Ungsveit Sinfóníuhljómsveitar Íslands og nemendum úr Tónlistarskólanum á Akureyri undir stjórn Guðmundar Óla Gunnarssonar hafi hafið páskahátíðina á glæsilegum nótum og hrifið áheyrendur með sér. Fjölmennt var á sviðinu en hljóðfæraleikarar voru alls 75. Á efnisskránni var Stjörnustríð eftir John Willams og Sinfónía nr. 6 eftir Tchaikovsky. Flutningurinn þótti einkennast af miklum krafti og það vakti hrifningu áheyranda að sjá svo margt ungt og efnilegt fólk á meðal hljóðfæraleika. Uppselt var á tónleikana og áheyrendur voru skemmtilega fjölbreyttir, m.a. mátti sjá marga unga Star Wars unnendur meðal þeirra. Einn áheyrandanna komst svo að orði:

Maður gjörsamlega nötraði í sætinu sínu af ástríðu og krafti, upplifunin var sterk og útskýringar hljómsveitarstjórans um skyldleika og sögu verkanna voru alveg frábærar og juku á hughrifin.

Sinfónía Norðurlands þakkar fyrir sig og óskar öllum gleðilegra páska