Víkingur Heiðar Ólafsson
18. starfsár Sinfóníuhljómsveitar Norðurlands hefst með þátttöku hljómsveitarinnar í vígslu Hofs laugardaginn 28. ágúst. Þetta eru afar merk tímamót í sögu hljómsveitarinnar því að Hof gjörbreytir allri aðstöðu hennar sem fær nú langþráð húsnæði til æfinga- og tónleikahalds.
Í tilefni þessara tímamóta var Hafliða Hallgrímsson tónskáld fenginn til að semja tónverk, hátíðarforleik sem hann nefnir HYMNOS og frumfluttur verður við þetta tækifæri.
Sunnudaginn 29. ágúst verða hátíðartónleikar SN í Hofi. Einleikari á tónleikunum er Víkingur Heiðar Ólafsson píanóleikari og stjórnandi Guðmundur Óli Gunnarsson.
Á efnisskrá tónleikanna er Píanókonsert eftir E. Grieg, Sinfónía nr. 9 eftir A. Dvorák og einnig verður endurtekið verk Hafliða HYMNOS.
Saga Capital styrkir hátíðartónleikana
Flutningur Sinfóníuhljómsveitar Norðurlands í HOF opnar á ýmsa möguleika fyrir hljómsveitina og nú er verið að undirbúa skólatónleika SN sem haldnir verða í Hofi í október 2010. Leitað var samstarfs við Bernd Ogrodnik brúðuleikgerðarmann og Leikfélag Akureyrar um að taka ævintýrið um Pétur og úlfinn eftir Prokofieff til flutnings og setja upp á sviðinu í HOFI með leikbrúðum.
Glæsilegir aðventutónleikar SN verða 4. desember. Á þeim tónleikum syngja systkinin Páll Óskar og Diddú með hljómsveitinni.
Slagverk og strengir verður yfirskrift tónleika 9. janúar en þá verður Hjörleifur Örn Jónsson slagverksleikari í aðalhlutverki.
Þann 5. febrúar mun SN ásamt rokksveitinni Dúndurfréttum flytja The Wall eftir Roger Waters og Pink Floyd. Um útsetningu sér Haraldur Vignir Sveinbjörnsson.
Fimmtudaginn 24. febrúar tekur SN þátt í tónleikaröð sem nefnist Klassík í Hofi. Á þeim tónleikum koma fram strengjakvartett og blásarakvintett skipaðir félögum úr SN. Tónleikarnir verða í minni salnum í Hofi, Hömrum.
Á skírdag 21. apríl, tekst hljómsveitin á við stór hljómsveitarverk eftir rússnesk tónskáld. Á efnisskránni verða Myndir á sýningu eftir Modest Mussorgsky, Festival overture eftir Dmitri Shostakovich, Capricio Italianne og 1812 overture eftir P.I. Tchaikovsky.
Laugardaginn 14. maí verður á dagskrá stórt samstarfsverkefni SN og Tónlistarskólans á Akureyri. TA fær til sín góða gesti frá Danmörku, 60 manna unglingahljómsveit frá Kaupmannahafnarsvæðinu. Það verður því stór hljómsveit sem stígur á svið í Hofi á þeim tónleikum þegar nemendur TA ásamt dönsku hljómsveitinni og SN sameinast.
Tvennir tónleikar eru ráðgerðir í samstarfi við Græna hattinn. Í september verður Gunnar Þórðarson á ferð með Vísnabókina og fær til liðs við sig félaga úr SN. Seinni tónleikarnir í samstarfi við Græna hattinn verða í nóvember þar sem hljómsveitin Hjaltalín leikur með SN.
